आज ५२ स्थानमा मतदान

शनिबार, मंसिर १४, २०७६



प्रतिनिधिसभा, प्रदेशसभा र स्थानीय तह उपनिर्वाचनअन्तर्गत शनिबार मतदान हुँदैछ। प्रतिनिधिसभा सदस्य १, प्रदेशसभा सदस्य ३ र स्थानीय तहका ४८ (प्रमुखर अध्यक्ष, उपप्रमुख र उपाध्यक्ष, वडाध्यक्ष) सिटका लागि मतदान हुँदैछ। उपनिर्वाचनमा ३७ जिल्लाका चार लाख ५४ हजार एक सय १४ मतदाता छन्। मतदान बिहान ७ देखि साँझ ५ बजेसम्मको समय तोकिएको छ। निर्वाचन आयोगले मतदानका लागि सम्मूर्ण तयारी पूरा भएको जनाएको छ।

प्रमुख निर्वाचन आयुक्त दिनेशकुमार थपलियाले उपनिर्वाचनको सम्पूर्ण तयारी पूरा भएको जानकारी दिए। उनले शनिबार बिहान ७ देखि साँझ ५ बजेभित्र आआफ्नो मतदान केन्द्रमा पुगी ढुक्क भएर मताधिकार प्रयोग गर्न मतदातालाई आग्रह गरेका छन्। ‘मतदानका लागि शान्तिसुरक्षालगायत आवश्यक सम्पूर्ण तयारी पूरा भएको छ,’ थपलियाले भने, ‘उपनिर्वाचन हुने क्षेत्रका सम्पूर्ण मतदातालाई ढुक्क भएर मताधिकार प्रयोग गर्न आग्रह गर्छु।’

आयोगका अनुसार तोकिएको समयभित्र मतदान केन्द्रमा उपस्थित मतदाताले मतदान गर्न पाउनेछन्। मतदान सकिएपछि निर्वाचन अधिकृतले सबै मतपेटिका मतदान अधिकृतबाट प्राप्त गरेपछि गणना कार्य शुरु हुनेछ।

उपनिर्वाचनअन्तर्गत प्रतिनिधिसभा सदस्यका लागि कास्की निर्वाचन क्षेत्र २, प्रदेशसभा सदस्यका लागि भक्तपुर निर्वाचन क्षेत्र–१ (क), बाग्लुङ निर्वाचन क्षेत्र–२ (ख) र दाङ निर्वाचन क्षेत्र–३ (ख) मा मतदान हुनेछ। यसैगरी स्थानीय तहतर्फ धरान उपमहानगरपालिका प्रमुख, संखुवासभाको मकालु गाउँपालिका अध्यक्ष, पाँचथरको फाल्गुनन्द गाउँपालिका अध्यक्ष, महोत्तरीको पिपरा गाउँपालिका अध्यक्ष र हुम्लाको खार्पुनाथ गाउँपालिका उपाध्यक्ष पदका लागि मतदान हुनेछ। विभिन्न गाउँपालिका तथा नगरपालिकामा रिक्त वडाध्यक्षका ४३ स्थानका लागि हुँदैछ।

उपनिर्वाचनमा चार लाख ५४ हजार एक सय १४ मतदातामध्ये दुई लाख ३३ हजार चार सय दुई महिला, दुई लाख २० हजार सात सय १० पुरुष र अन्य दुईजना छन्। कास्की–२ मा ७१ हजार आठ सय ७१ जना मतदाता छन्। भक्तपुर–१ (क) मा ४५ हजार १५, बाग्लुङ–२ (ख) मा ३५ हजार १ सय ८४ र दाङ ३ (ख) मा ६८ हजार ७ सय १९ मतदाता छन्। स्थानीय तहतर्फ दुई लाख ३३ हजार तीन सय २५ मतदाता रहेको आयोगले जनाएको छ। आयोगका अनुसार प्रतिनिधिसभा, प्रदेशसभा र स्थानीय तह निर्वाचन २०७४ पछि उपनिर्वाचन हुन लागेका क्षेत्रमा १६ हजार दुई सय १९ मतदाता थप भएका छन्।

उपनिर्वाचनमा प्रतिनिधिसभा सदस्यका लागि ११, प्रदेशसभा सदस्यका लागि १५ र स्थानीय तहका विभिन्न पदका लागि २० वटा राजनीतिक दल सहभागी भएका छन्। उपनिर्वाचनमा प्रतिस्पर्धामा रहेका तीन सय ३३ उम्मेदवारमध्ये राजनीतिक दलका दुई सय ५३ र स्वतन्त्र ४ जना छन्। दुई सय ५३ पुरुष र ८४ महिला उम्मेदवार छन्। नागरिक दैनिक

Loading...

प्रतिक्रिया दिनुहोस

Powered by Facebook Comments

Janata