विदेशीलाई टोपी लगाएर सातौँ नेपाली टोपी दिवस मनाइयो

बुधबार, पुस १६, २०७६



काठमाडाै । जागरूक युवा अभियान नेपालले विगत वर्षहरूमा झैँ यस वर्ष पनि अन्तर्राष्ट्रिय नेपाली टोपी दिवस भव्य रूपमा मनाएको छ । बुधवार राजधानीको माइतीघरमा जम्मा भएका युवायुवतीहरूले राष्ट्रिय पहिचान झल्काउने पोसाक, दौरा सुरुवाल, ढाका टोपी, कालो टोपी लगाएर राष्ट्रिय गीत गाउँदै टोपी दिवस मनाएका हुन् ।

यस पटकको टोपी दिवस मनाउँदै संस्थाले सरकारको नेपाल भ्रमण वर्ष अभियानलाई पनि साथ दिएको छ । यस क्रममा कार्यक्रममा आएकी अमेरिकी नागरिक बारबारा नेबरलाई ढाका टोपी लगाइदिएर संस्थाका संयोजक घनश्याम श्रेष्ठले स्वागत गरेका थिए । कार्यक्रममा नेपाली टोपी दिवस मनानुको कारण र टोपीको महत्वका बारेमा संस्थाका संस्थापक रामजी बलामी र सचिव ज्ञानमणि नेपाल कालोटोपीले प्रस्ट पारेका थिए ।कार्यक्रममा उपस्थित संचारकर्मी सम्झना पौडेलले राष्ट्रिय पोसाक हटाउने सरकारको निर्णय सच्याएर नेपाली पहिरनको सम्मान गर्नु पर्ने बताइन् । यस्तै संस्थाका उपाध्यक्ष जर्नाजन पौडेलले अभियानको सार्थकता र महत्वका बारेमा बताएका थिए ।

topi day 2020 (6)

अभियानले विगत ७ वर्षदेखि अङ्ग्रेजी नयाँ वर्ष अर्थात् जनवरी १ का दिन अन्तर्राष्ट्रिय  नेपाली टोपी दिवस मनाउँदै आएको छ । यस वर्ष पनि सातौं अन्तर्राष्ट्रिय  टोपी दिवसको अवसरमा आयोजक जागरुक युवा अभियान नेपालले काठमाडौँको माइतीघर मण्डलामा भेला भई कार्यक्रम गरेको हो । कार्यक्रममा सबै उमेर समूहका साहित्यकार, कलाकार, विद्यार्थी, पत्रकार तथा विभिन्न पेसाकर्मीहरूको उल्लेख्य सहभागिता रहेको छ ।

topi day 2020 (4)

अङ्ग्रेजी नयाँ वर्ष मनाउनु नराम्रो कुरा होइन तर यसलाई नेपालीपन झल्किने गरी मनाउन सके यसको थप महत्त्व झल्किन्छ भन्ने उद्देश्यले यसै दिन नेपाली टोपी दिवस मनाउन सुरुवात गरिएको जागरुक युवा अभियान नेपालका संयोजक घनश्याम श्रेष्ठले बताए । संस्थाले यो वर्ष नेपाल सरकारको नेपाल भ्रमण वर्ष अभियानलाई सहयोग पुग्ने गरी नेपाली टोपी दिवस मनाएको पनि उनले जानकारी दिए ।

जागरूक युवा अभियान नेपालले यस वर्षको टोपी दिवसको नारा भ्रमण वर्षको बहार, नेपाली टोपी उपहार राखेको थियो । गत वर्ष यस संस्थाले सबैभन्दा ठुलो आकारको नेपाली टोपी प्रदर्शन गरेको थियो ।

Loading...

प्रतिक्रिया दिनुहोस

Powered by Facebook Comments