राष्ट्रिय परिचयपत्र वितरण आजबाट

सोमवार, मंसिर ३, २०७५



काठमाडौं । सरकारले राष्ट्रिय परिचयपत्र वितरण आजबाट गर्ने भएको छ । पाँचथरको फिदिमबाट आज एक विषेश कार्यक्रम गरि परिचयपत्र वितरण गरिनेछ । गृहमन्त्री रामबहादुर थापाले परिचयपत्र वितरण सुरु गर्नुहुनेछ । परिचयपत्र वितरणका लागि मन्त्री थापाको नेतृत्वमा केन्द्रबाट १८ जनाको टोली आज बिहानै पाँचथर पुग्नेछ । यसअघि प्रधानमन्त्री केपी शर्मा ओली जाने तय भएपनि स्वास्थ्य अवस्थाका कारण गृहमन्त्री थापा जान लाग्नुभएको हो ।

पाँचथर जिल्लाका एकजना ज्येष्ठ नागरिक र सिंहदरबारका एक जना कर्मचारीलाई राष्ट्रिय परिचयपत्र वितरण गरी कार्यक्रमको शुभारम्भ गरिने छ । कार्यक्रममा गृहमन्त्री थापा, प्रदेश–१ का मुख्यमन्त्री शेरधन राई, गृहसचिव प्रेमकुमार राई, राष्ट्रिय परिचयपत्र तथा पञ्जीकरण विभागका महानिर्देशक दीपक काफ्लेलगायतको सहभागिता हुनेछ ।

परिचयपत्र वितरणका लागि पाँचथरमा ५२ हजार नागरिकको विवरण सङ्कलन भइसकेको छ । त्यसैगरी, सिंहदरबारका उच्च पदस्थ व्यक्तित्व र कर्मचारीको समेत विवरण सङ्कलन भइसकेको छ । परिचयपत्र वितरण प्रक्रियालाई भोलिदेखि नै मुलुकभरि अभियानको रुपमा अगाडि बढाइने विभागले जनाएको छ ।

अबको तीन वर्षभित्र १६ वर्ष उमेर पुगेका सबै नेपाली नागरिकलाई यो परिचयपत्र वितरण गर्ने लक्ष्य लिएको छ । पाँचथर जिल्लाका एकलाख दशहजार नागरिक र सिंहदरबारका उच्च पदस्थ व्यक्तित्वसहित सातहजार कर्मचारीलाई पहिलो चरणमा परिचयपत्र वितरण गरिने विभागले जनाएको छ । यो परिचयपत्रले व्यक्तिको राहदानी, जमिनको स्वामित्व, करदाता सूचना, आर्थिक कारोबारका विवरणलाई समेत प्रमाणित गर्ने बताइएको छ ।

219 पटक पढिएको
Loading...

प्रतिक्रिया दिनुहोस

Powered by Facebook Comments

janta bank (Detail page 1st) Janata Bank (Detail page 2nd) Janata Bank