पृथ्वीनारायण शाहका दिव्योपदेशहरू आज पनि उतिकै सान्दर्भिक छ- पूर्वराजा

आइतवार, पुस २७, २०७६



काठमाडौं । पूर्वराजा ज्ञानेन्द्र शाहले मुलुकले नचाहेको र असान्दर्भिक विषयलाई विवादमा पार्ने प्रयास कतैबाट हुन् नदिन आग्रह गरेका छन् । २ सय ९८ औं पृथ्वी जयन्तीका अवसरमा शनिबार साँझ विज्ञप्ति जारी गर्दै पूर्व राजा ज्ञानेन्द्र शाहले राष्ट्रिय अखण्डता र स्वाभिमानलाई कुण्ठित पार्ने प्रयास कतैबाट हुन नहुने बताएका छन् ।

‘राष्ट्र नायकहरूको वीरगाथाबारे बोल्न नसक्ने, माटोको सम्मानमा बोल्नै नहुने, राष्ट्रिय अखण्डता र स्वाभिमानलाई कुण्ठित पार्ने एवं मुलुकले नचाहेको र असान्दर्भिक विषयमा मुलुकलाई विवादमा पार्ने प्रयास कतैबाट हुनु हुँदैन ।’

शाहले विज्ञप्तीमा हिमाल, पहाड र तराई मिलेर बनेको नेपाल राज्य स्वतन्त्र, शान्त, अभिभाज्य र अखण्ड रहनुपर्ने समेत उल्लेख गरेका छन् । यस्तै मातृभूमि नेपाल सदा स्वतन्त्र, शान्त, अभिभाज्य र अखण्ड रहनुपर्नेमा समेत उनले जोड दिएका छन् ।

विज्ञप्ती मार्फत उनले देशको सिमा रक्षाका लागि पर्याप्त पहल नभएको भन्दै सबै भूभागको रक्षा र सबै देशबासीको समृद्धिका लागि गहकिलो प्रयास समेत हुनु पर्ने उल्लेख गरेका छन् र ‘सत्य कहिल्यै हार्दैन, स्वाभिमान कहिल्यै मर्दैन’ भन्दै पूर्व राजा शाहले जनमानसमा के छ र के भइरहेको छ सबैमा स्पष्ट रहेको बताएका छन् ।

पृथ्वीनारायण शाहका दिव्योपदेशहरू आधुनिक नेपाल निर्माणको प्रक्रियामा आज पनि उतिकै सान्दर्भिक रहेको उल्लेख गरेका छन् ।

Loading...

प्रतिक्रिया दिनुहोस

Powered by Facebook Comments