भूमि फिर्ताका लागि द्विपक्षीय वार्ता गछौंं : मन्त्री अर्याल

शनिबार, जेष्ठ ३१, २०७७



भूमि व्यवस्था सहकारी तथा गरिबी निवारणमन्त्री पद्माकुमारी अर्यालले हालै नेपाली नक्सामा समेटिएको कालापानी, लिपुलेक र लिम्पियाधुरासहितको अतिक्रमित भूमिलाई फिर्ता ल्याउन सरकार प्रतिवद्ध रहेको बताएकी छन् ।

नेपाल राष्ट्रिय शिक्षक सङ्गठन गण्डकी प्रदेश समितिले जुममार्फत आयोजना गरेको शिक्षक तालिमको समापन सत्रमा उनले सरकारले तथ्य र प्रमाणका आधारमा नक्सा जारी गरिसकेकाले भारतीय पक्षबाट भोगचलन भएको सो भूमिलाई फिर्ता ल्याएर नेपालको हो भनेर पुर्जासहित प्रमाणित गरिने स्पष्ट पारिन् ।

कूटनीतिक र द्विपक्षीय वार्तालाई सरकारले महत्त्व दिएकाले वार्ताबाट नै समस्या समाधान गर्न सक्छौँ भन्ने दृढ विश्वासका साथ सरकार अघि बढेको मन्त्री अर्यालले बताइन् ।

कोरोनाका कारणले अन्य सबै क्षेत्रजस्तै शिक्षाक्षेत्रमा पनि ठूलो असर पारेको बताउँदै मन्त्री अर्यालले विद्यमान अवस्थामा शिक्षक, विद्यार्थी र अभिभावकलाई जोड्नका लागि अनलाइन प्रविधि महत्त्वपूर्ण उल्लेख गरिन् ।

हालको विषम परिस्थितिमा समेत इन्टरनेट साक्षरताले बढावा आएको बताउँदै उनले अध्ययन÷अध्यापनमा सबैलाई जोड्न सकिने माध्यमको खोजीका लागि सरकारले शिक्षा मन्त्रालयमार्फत योजना बनाउने जानकारी दिइन् ।

‘बालबालिकालाई विद्यालयमा ल्याऔँ र पढाइमा टिकाऊँँ’ भन्ने कुरालाई सरकारले प्राथमिकतामा राखेको बताउँदै मन्त्री अर्यालले  सार्वजनिक विद्यालयलाई गुणस्तरीय शिक्षाको केन्द्र बनाइने र सार्वजनिक विद्यालय सुधारका लागि विसं २०७६ देखि २०८५ सम्म सवलीकरण दशक शुरु गरिएको स्पष्ट पारिन् ।

पूर्वमन्त्री एवं नेपाल कम्युनिष्ट पार्टी (नेकपा) सल्लाहकार परिषद्का अध्यक्ष केशव बडालले सहकारी अर्थव्यवस्थालाई बलियो बनाउन माध्यमिक विद्यालय तहदेखि नै अर्थशास्त्रको प्राविधिक ज्ञान दिइनुपर्नेमा जोड दिए ।

नेपाल प्रज्ञा प्रतिष्ठानका उपकूलपति डा.जगमान गुरुङले संस्कार र संस्कृतिप्रति शिक्षकमा गहिरो अध्ययन आवश्यक पर्ने बताए ।

सङ्गठनका केन्द्रीय अध्यक्ष लक्ष्मण शर्माले शिक्षकका अधिकार र हितका सवालमा जारी बन्दाबन्दीकाे अवधिमा समेत अनलाइनका माध्यमबाट शिक्षा मन्त्रालयसँग वकालत गरिरहेको उल्लेख गरे । उनले सूचना प्रविधिका बारेमा आधारभूत ज्ञान भएका शिक्षकको सर्टिफिकेशन गर्ने योजना रहेको सुनाए ।

सङ्गठनका गण्डकी प्रदेश अध्यक्ष राम पोखरेलले शिक्षकलाई बन्दाबन्दीमा समेत गुणस्तरीय शिक्षालगायतका विभिन्न विषयमा विषयविज्ञबाट सैद्धान्तिक ज्ञानसहित सूचना प्रविधिकाे माध्यमबाट विद्यार्थी र शिक्षकलाई कसरी जोड्न सकिन्छ भन्नेबारेमा चार दिनको तालिममा ज्ञान दिइएको बताए ।

Loading...

प्रतिक्रिया दिनुहोस

Powered by Facebook Comments