एसिया छनोटको दोस्रो खेलमा नेपालको थाइल्याण्डसँग प्रतिस्पर्धा

बिहिबार, फाल्गुन ९, २०७५



काठमाडौँ । अन्तर्राष्ट्रिय क्रिकेट काउन्सिल महिला विश्वकप क्रिकेटको एसिया छनोटको दोस्रो खेलमा नेपालले आज घरेलु टोली थाइल्याण्डसँग प्रतिस्पर्धा गर्दैछ ।

पहिलो खेलमा मलेसियालाई ३४ रनले पराजित गर्दै सुखद शुरुआत गरिसकेको नेपाल घरेलु टोलीविरुद्ध आज मैदान उत्रँदा नेपाल लगातार दोस्रो जितको खोजीमा हुनेछ । बलियो थाइल्याण्डविरुद्ध जित निकाल्न नेपालले कठिन चुनौती गर्नुपर्नेछ ।

थाइल्याण्डले गत महिना महिला टि–२० स्म्यास प्रतियोगितामा नेपाललाई नौ विकेटले पराजित गर्दै उपाधि उचालेको थियो ।

यस्तै थाइल्याण्ड पनि दोस्रो जितको खोजीमा छ । थाइल्याण्डले पहिलो खेलमा चीनलाई छ विकेटले पराजित गरेको थियो ।

दुई खेलमा दुई जितका साथ युएई अङ्क तालिकाको पहिलो स्थानमा छ । समान एक जित निकालेको नेपाल र थाइल्याण्ड रन रेटका आधारमा क्रमश दोस्रो र तेस्रो स्थानमा छन् ।

राउण्ड रोबिनको आधारमा हुने छनोटको विजेताले आइसिसी महिला टी–२० विश्वकपको ग्लोबल छनोटमा पुग्नेछ । नेपाली टोलीका मुख्य प्रशिक्षक विनोद दासले आजको खेल जित्न सके नेपाल ग्लोबल छनोटमा पुग्ने दाबी गरे।

उनले भने, “प्रतियोगितामा सहभागी टोलीमध्ये सबैभन्दा बलियो टोलीको रुपमा थाइल्याण्डलाई हेरिएको छ, हामीले आज थाइल्याण्डविरुद्ध जित निकाल्न सके अर्को चरणमा पुग्ने सम्भावना बलियो हुनेछ ।”

यसैबीच भर्खरै थाइल्याण्डले टस जितेर ब्याटिङ गर्ने निर्णय लिएको छ ।

Loading...

प्रतिक्रिया दिनुहोस

Powered by Facebook Comments

Janata