५५ देशका नागरिकलाई नेपाल प्रवेशमा प्रतिबन्ध

बिहिबार, चैत्र ६, २०७६



सरकारले कोरोना संक्रमण (कोभिड १९) देखिएकामध्ये ५५ देशबाट नेपालीसहित विदेशी नागरिकलाई नेपाल आउन प्रतिबन्ध लगाएको छ ।

कोभिड १९ संक्रमण रोकथाम तथा नियन्त्रण उच्चस्तरीय समन्वय समितिको बुधबार सिंहदरबारमा बसेको बैठकले २० मार्चदेखि १५ अप्रिल (७ चैतदेखि ७ वैशाख २०७७) सम्म कोरोना प्रभावित देशमध्ये ५५ वटा देशबाट नेपाल आउने नेपालीसहित विदेशीमाथि प्रतिबन्ध लगाएको हो ।

जसअनुसार युरोपका सबै मुलुक, पश्चिम एसियालगायत इरान, टर्की, मलेसिया, दक्षिण कोरिया र जापानबाट आउने र ती मुलुकलाई ट्रान्जिट बनाएर आउने नेपालीसहित विदेशी नागरिकलाई नेपाल आउन प्रतिबन्ध लगाइएको छ ।

यो निर्णयसँगै दक्षिण कोरिया, जापान, मलेसिया, यूएई, कतारलगायत मुलुकमा वैदेशिक रोजगारीका लागि गएका नेपालीसमेत तोकिएको समयसम्म स्वदेश फर्कन पाउनेछैनन् । उपप्रधान तथा रक्षामन्त्री एवं समितिका संयोजक ईश्वर पोखरेलको संयोजकत्वमा समितिको बैठक बसेको थियो ।

कोभिड १९ संक्रमण रोकथाम तथा नियन्त्रण उच्चस्तरीय समन्वय समितिका सदस्य तथा संस्कृति, पर्यटन तथा नागरिक उड्डयनमन्त्री योगेश भट्टराईले करिब ५५ देशका नागरिकलाई नेपाल आउन प्रतिबन्ध लगाएको बताए ।

‘संक्रमणको उच्च जोखिम रहेका करिब ५५ मुलुकबाट नेपाल आउनेमाथि प्रतिबन्ध लगाइएको हो,’ मन्त्री भट्टराईले भने ।

बैठकले ट्राभल एडभाइजरी जारी गरेको अवधिमा हवाई टिकट रद्द गर्दा पूरै रकम फिर्ता दिन र यात्रा मिति परिर्वतन गर्दा शुल्क नलिन वायु सेवा कम्पनीलाई आग्रह गरेको छ ।

यसअघि सरकारले १८ फागुनमा चीन, दक्षिण कोरिया, इरान, इटली र जापानका नागरिकलाई नेपाल आएपछि प्रदान गरिँदै आएको अन अराइभल भिसामा रोक लगाएको थियो ।

यस्तै, २९ फागुनमा सबै देशका विदेशी नागरिकलाई दिइँदै आएको अन अराइभल भिसा रोक्ने निर्णय भएको थियो भने नेपाल प्रवेश गर्नेलाई १४ दिन क्वारेन्टाइनमा राख्ने निर्णय भएको थियो ।

भारतसँगका नाकाबाट आवतजावत रोकिँदै

विश्वभर फैलिएको कोरोना संक्रमण भित्रिन नदिन अनेक उपाय अपनाइरहेको सरकारले भारततर्फका नाकाबाट आवतजावत रोक्ने तयारी गरेको छ ।

कोभिड १९ संक्रमण विश्वभर फैलिँदै गएपछि चीनतर्फका नेपालसँग जोडिएका नाका बन्द भइसकेका छन् भने सरकारले भारतसँगका नाकाबाट आवतजावत रोक्ने तयारी गरेको छ । तर, भारतबाट हुने अत्यावश्यक सामग्रीको आयात भने रोकिनेछैन ।

स्रोतका अनुसार बिहीबारबाट भारतसँग जोडिएका नाकाबाट मानवीय आवतजावत रोक्ने सरकारको तयारी छ । सो विषयमा बुधबार परराष्ट्र मन्त्रालयका सचिव शंकरदास वैरागी र नेपालका लागि भारतीय राजदूत विजयमोहन क्वात्राबीच छलफल भएको स्रोत बताउँछ । तर, भारततर्फको स्पष्ट जवाफ आइसकेको छैन ।

Loading...

प्रतिक्रिया दिनुहोस

Powered by Facebook Comments