नेपाल वायु सेवा निगमले पहिलो पटक वाइडबडी जहाज भित्र्यायो

बिहिबार, असार १४, २०७५



काठमाडौँ । नेपाल वायु सेवा निगमले पहिलो पटक वाइडबडी जहाज ल्याएको छ । निगमले बिहीबार ‘ए ३३०–२००’ जहाज त्रिभुवन अन्तर्राष्ट्रिय विमानस्थलमा अवतरण गराएको छ । उक्त विमान फ्रान्सको तुलुजबाट ९ घण्टाको उडानपछि ल्याइएको हो ।

२७४ सिट रहेको जहाजमा १८ वटा विजनेश क्लासका सिट रहेको र बाँकी २५६ वटा साधारण सिट छ । १० करोड ४८ लाख अमेरिकी डलरमा विमान भित्र्याइएको हो ।

सरकारको ग्यारेन्टीमा कर्मचारी सञ्चयकोष र नागरिक लगानी कोषबाट लिएको रु १२-१२ अर्बको ऋणबाट दुईवटा विमान खरीद गरिएको निगमले जनाएको छ ।

निगमले अमेरिकी कम्पनी एएआरसँग खरिद गरेका दुई वाइड बडी विमानमध्ये पहिलो विमान आएको हो । दोस्रो विमान डेढ महिनापछि ल्याइनेछ । २०७४ साल वैशाख ७ गते सरकारबाट ग्यारेन्टी स्वीकृत भएपछि खरीदका लागि ऋण लिने प्रक्रिया अगाडि बढाइएको थियो । जेठ २८ गते नागरिक लगानी कोष र कर्मचारी सञ्चयकोषसँग ऋण सम्झौता भएको थियो ।

निगमका अनुसार विमानको प्रतिथान मूल्य रु १० करोड ४८ लाख अमेरिकी डलर निर्धारण भएको छ । कूल २७४ सिट क्षमताको वाइड बडी अन्नपूर्णको १८ वटा सांग्रिला ‘बिजनेस क्लास’ र २५६ सिट साधारण क्लासका छन् ।

निगमका महाप्रबन्धक सुगतरत्न कंसाकार, प्रवक्ता रवीन्द्र श्रेष्ठसहित चालकदलका (नौ जना) सदस्य गरी १९ जना यात्रु बोकेर काठमाडौँ उत्रिएको वाइड बडीको विमानस्थलमा भव्य रुपमा स्वागत गरिएको थियो ।

संस्कृति, पर्यटन तथा नागरिक उड्डयनमन्त्री रवीन्द्र अधिकारी, पर्यटन मन्त्रालय र प्राधिकरणका उच्च अधिकारी तथा निगमका कर्मचारीको उपस्थिति थियो । विमानस्थलमा कूटनीतिक नियोगका प्रतिनिधि पनि सहभागी थिए ।

वाइड बडी विमानको उद्घाटन समारोहलाई सम्बोधन गर्दै पर्यटनमन्त्री अधिकारीले वाइड बडी विमानको स्वागत गर्न पाउँदा निगम परिवार मात्र नभई देशले नै खुशी मनाएको बताए ।

उनले भने ‘तपाईहरुको मेहनत र परिश्रमबाट धेरै आरोह–अवरोह पार गर्दै निगम यहाँसम्म आइपुगेको छ । यसको प्रगतिमा अझै हामी सन्तुष्ट हुन सकेका छैनौँ किनभने हामी सँगसँगैका धेरै अगाडि बढिसके उनीहरुलाई उछिन्ने गरी हामी अघि बढ्नुछ, त्यसका लागि निगमले अन्तर्राष्ट्रिय उडानलाई प्रभावकारी बनाएर आफ्नो व्यावसायिक जीवनमा सफलता कायम गर्नेछ यसका लागि बधाई तथा शुभकामना दिन चाहन्छु ।’

उनले नेपाल भ्रमण वर्षलाई सफल बनाई निरन्तर पर्यटन प्रवद्र्धन विकासका लागि निगमको विमान महत्वपूर्ण कोशेढुंगा साबित हुने विश्वास व्यक्त गरे ।

मन्त्री अधिकारीका अनुसार अबको डेढ महिनापछि अर्को वाइड बडी विमान आउने र सन् २०१९ को अन्त्यमा दुई वटा न्यारो बढी विमान आउने हुँदा सन् २०२० को भ्रमण वर्षमा सफलता हासिल हुनेछ । सरकारले निगमको सेवालाई अझ गुणस्तरीय र प्रभावकारी बनाउन विभिन्न भूमिका खोजिरहेको उल्लेख गर्दै मन्त्री अधिकारीले व्यवस्थापनलाई खुल्ला रुपबाट प्रतिस्पर्धामा जानसक्ने वातावरण बनाएर निगमको प्रगति गर्न चाहेको स्पष्ट पारे ।

‘सरकार कसैको हातखुट्टा बाँध्ने पक्षमा छैन तपाईंहरु उड्नुस् खुल्ला आकासमा सक्ने जति त्यसअनुसारले काम गर्नुस् म सरकारका तर्फबाट गर्नुपर्ने सबै प्रकारको सहयोगको प्रतिबद्धता दिलाउछु’ उनले भने ।

निगमका महाप्रबन्धक कंसाकारले निगमलाई विश्वस्तरको प्रतिस्पर्धी बनाउन सबै पक्ष लागिपर्ने बताए ।
उनले निगमको आन्तरिक उडानलाई पनि विमानस्थल पुगेका सबै स्थानमा विमान पु¥याउने योजना सुनाए । कंसाकारले संस्थालाई वास्तविक व्यावसायिक रुपमा अघि बढाउनका लागि प्रतिस्पर्धामा जानैपर्ने आवश्यकता औँल्याए ।

आगामी दिनमा नेपाली पाइलटहरुले पनि वाइड बडी विमान उडाउनेछन् । पहिलो चरणमा दुबई-दोहा उडान गरिनेछ भने त्यसपछिका चरणमा जापान, दक्षिण कोरिया र साउदी अरेबियाको रियादमा उडान गरिनेछ ।

निगमले २०७३ साल चैत २५ गते अमेरिकी लिजिङ कम्पनी एएआरसँग दुई वाइड बडी ‘ए ३३०–२००’ एयरबस विमान खरीद गर्ने सम्झौता गरेको थियो । दुईवटा जहाजको लागत रु २१ अर्ब ९० करोड छ ।

निगमले हाल अन्तर्राष्ट्रिय उडानका आठ गन्तव्य भारतको नयाँदिल्ली, बेङ्लोर र मुम्बई तथा हङ्कङ, मलेशिया, थाइल्याण्ड, दोहा र दुबईमा उडान भर्दै आएको छ । एक बोइङ नाइन एसिबी–५७५ र एयरबस ३२० सिरिजको दुईवटा जहाजबाट निगमले अन्तर्राष्ट्रिय उडान गरिरहेको हो । निगमले आन्तरिकतर्फ नौवटा विमानबाट सेवा दिइरहेको छ । यीमध्ये चीनबाट ल्याइएका वाई १२ चार, एमए ६० दुई र तीन वटा ट्विनअटर विमान छन् ।

291 पटक पढिएको
Loading...

प्रतिक्रिया दिनुहोस

Powered by Facebook Comments

janta bank Janata Bank Janata Bank