कांग्रेससहित चार दलको सर्बदलिय बैठक सम्पन्न, दुइवटै अध्यादेश फिर्ता लिन माग

बुधबार, बैशाख १०, २०७७



काठमाडाैं । प्रखुम प्रतिपक्षी दल नेपाली कांग्रेस सहितका चार दलकाे सर्वदलिय बैठक सम्पन्न भएकाे छ ।  नेपाली कांग्रेसको आग्रहमा बुधबार नेपाली कांग्रेस केन्द्रीय कार्यालयमा संघीय संसदमा प्रतिनिधित्व गर्ने नेपाली कांग्रेस पार्टी, राष्ट्रिय जनता पार्टी, समाजवादी पार्टी, र राष्ट्रिय प्रजातन्त्र पार्टीका शीर्ष नेताहरुको बैठक सम्पन्र भएकाे हाे ।

उक्त बैठकमा नेपाली कांग्रेसका तर्फबाट  शेरबहादुर देउवा, रामचन्द्र पौडेल, विमलेन्द्र निधि,  विजयकुमार गच्छदार,  पूर्णबहादुर खड्का, डा. प्रकाशशरण महत, गोपालमान श्रेष्ठ, प्रकाशमान सिंह, कृष्णप्रसाद सिटौला,  बालकृष्ण खाँण,  विश्वप्रकाश शर्मा र राधेश्याम अधिकारी । राष्ट्रिय जनता पार्टीका तर्फबाट महन्थ ठाकुर, राजेन्द्र महतो,  महेन्द्र यादव र  शरदसिंह भण्डारी  त्यस्तै समाजवादी पार्टी  डा.वावुराम भट्टराई,  उपेन्द्र यादव,  अशोक राई र राजेन्द्र श्रेष्ठ र  राष्ट्रिय प्रजातन्त्र पार्टी  श्री पशुपति शम्शेर राणाकाे उपस्थिति रहेकाे थियाे ।

बैठकले गरेका  निर्णय निम्नानुसार रहेका छन

१) वर्तमान नेपाल कम्युनिष्ट पार्टीको नेतृत्वमा रहेको ओली सरकारले कोरोना संक्रमणको कारण देश लकडाउनको अवस्थामा रहेको बेला हठात् संवैधानिक परिषद् काम, कर्तव्य, अधिकार र कार्यविधि०पहिलो संशोधन० अध्यादेश, २०७७ र राजनीतिक दल सम्बन्धी (तेस्रो संशोधन० अध्यादेश, २०७७ सम्बन्धी ऐनमा गरेको संशोधन सम्बन्धी अध्यादेशहरु वर्तमान संविधानको मूल मर्म र लोकतान्त्रिक मूल्य र मान्यताको घोर उल्लंघन भएकोले यसको घोर निन्दा गर्दछौं । ओली नेतृत्वको सरकारको लोकतान्त्रिक मूल्य र मान्यतालाई समाप्त पारी निरंकुश शासनतर्फ उन्मुख श्रृङ्खलावद्ध कदमहरुको पछिल्लो नाङ्गो कदमका रुपमा यी अध्यादेशहरुलाई हामीले लिएका छौँ । यी दुवै अध्यादेश तत्काल फिर्ता लिन यो बैठक जोडदार माग गर्दछ ।

२) मन्त्री परिषद्को निर्णयबाट राष्ट्रपतिबाट जारी यी अध्यादेशहरुले वर्तमान संघीय लोकतान्त्रिक गणतन्त्रात्मक संविधानको मूल मर्ममा आक्रमण गरेकोले सामाजिक दुरी कायम गर्ने व्यवस्था मिलाई तत्काल संघीय संसदको बैठक बोलाउन सरकारसँग यो बैठक जोडदार माग गर्दछ ।

३) यो बैठक कोरोना संक्रमणको कारण लकडाउनको अवस्थामा देश रहेको र यसका कारण आम जनता खाद्यान्न लगायतका न्यूनतम आवश्यकताहरुबाट पनि विस्तारै वञ्चित हुँदै गएको छ । सरकार राहत, उद्धार र कोरोना संक्रमणका सम्भावितहरुलाई दु्रत गतिमा जाँच, र स्वास्थ्य सेवाबाट वञ्चित रहेका नागरिकहरुप्रति संवेदनशील नभएको मात्र होइन, पक्षपात र भेदभावपूर्ण तरिकाबाट प्रस्तुत भएकाप्रति यो बैठक सरकारको गम्भीर ध्यानाकर्षण गराउँछ ।

४) यो बैठक राजनीतिक दलहरु, नागरिक समाज र आम नेपाली दिदीबहिनी दाजुभाइहरुमा सरकारको अधिनायकवाद उन्मुख कदमहरुप्रति थप चनाखो भई सरकारका लोकतन्त्र विरोधी र जनविरोधी कामहरुका विरुद्धमा सचेत र जागरुक हुन अपिल गर्दछ ।

५)यो बैठक संघीय संसद बाहिर रहेका राजनीतिक दलहरु र नागरिक समाजसँग पनि थप अन्तरक्रिया र छलफल गर्ने निर्णय गर्दछ ।

६) हाल लकडाउनको अवस्थामा त्यसको सिमाभित्र रहेर सरकारको यो अलोकतान्त्रिक कदमको विरुद्धमा जनमत सिर्जना गर्न निरन्तर क्रियाशील रहने र लकडाउनपछि सरकारको निरंकुश र जनविरोधी कदमका विरुद्ध आवश्यक कदम उठाउन वाध्य हुने यो बैठक निर्णय गर्दछ ।

श्री शेरबहादुर देउवा, सभापति — नेपाली कांग्रेस

श्री शरदसिंह भण्डारी, संयोजक — राष्ट्रिय जनता पार्टी

श्री उपेन्द्र यादव, अध्यक्ष — समाजवादी पार्टी

श्री पशुपति शम्शेर राणा, अध्यक्ष— राष्ट्रिय प्रजातन्त्र पार्टी

Loading...

प्रतिक्रिया दिनुहोस

Powered by Facebook Comments