सडक सुधारको माग गर्दै स्थानीयवासीद्दवारा उजुरी

शनिबार, असार १६, २०७५



धनकुटा ।

आवतजावतमा समस्या उत्पन्न भएपछि सडक सुधारको माग गर्दै स्थानीयवासीले जिल्ला प्रशासन कार्यालय धनकुटामा उजुरी गरेका छन् ।

मध्यपहाडी लोकमार्ग पूर्वीखण्ड सुधारको माग गर्दै धनकुटाको हिलेदेखि पाख्रिबाससम्मका ४९८ स्थानीयवासीले बिहीबार संयुक्त रुपमा जिल्ला प्रशासन कार्यालयमा उजुरी दर्ता गराएका हुन् ।उनीहरुले जिल्ला प्रशासन कार्यालयसँगै सडक डिभिजन कार्यालय धनकुटा, पाख्रिबास नगरपालिका र जिल्ला समन्वय समिति एवं सडक निर्माण डिकुरे साइडको कार्यालयमासमेत उजुरी दिएको जनाएको छ ।

सडक निर्माणको कार्य छिटोभन्दा छिटो सुचारु नभए र गाडी आवतजावत गर्न बाधा पुगेको खण्डमा वाध्य भएर आन्दोलन गर्नुपर्ने उजुरी पत्रमा उल्लेख छ ।

मध्यपहाडी लोकमार्गअन्तर्गत हिलेदेखि पाख्रिबाससम्म पाँच किलोमिटर सडकखण्ड हिलाम्ये हुँदा सवारीसाधन सञ्चालनमा समस्या उत्पन्न भएको छ । निरन्तरको वर्षाका कारण सडक हिलाम्ये बनाउँदा सुनसरीको धरान हुँदै धनकुटाका ग्रामीण क्षेत्रसहित भोजपुर, संखुवासभातर्फ जाने सवारीसाधन र पैदल यात्रुलाईसमेत आवतजावतमा समस्या हुन थालेपछि त्यसको समाधानका लागि उजुरी दिनुपरेको स्थानीय कृष्णबहादुर कटुवालले बताए ।

उनले भने “ पाँच किलोमिटर दूरी पार गर्न १५ मिनेट लाग्ने सडकमा हिलाम्ये भएका कारण सवारीसाधनलाई अहिले दुई घण्टाभन्दा बढी समय लाग्ने गरेको छ ।”

सो सडकखण्डको हिलेन्यूरोड छेउदेखि मुगा खोलासम्म र पाख्रिबास फारम गेटदेखि सिंहदेवी मन्दिरसम्मको सडक क्षेत्र हिलाम्ये भएपछि यातायात र पैदलयात्री सबैलाई सास्ती व्योहोर्नु परिरहेको छ ।

हिलेदेखि पञ्चेसम्म करीब १३ किलोमिटर सडक निर्माण गर्ने ठेक्का कञ्चनजंगा मोदीदान रायमाझी जेवीले लिई आव २०७१÷०७२ देखि निर्माण कार्य शुरु गरेको थियो ।

निर्माणकार्य ढिलो गतिमा भएका कारण दैनिकरुपमा भोजपुर संखुवासभा आवतजावत गर्ने लामोदूरीका सवारी सञ्चालनमा कठिनाइ भएको स्थानीय योगेन्द्र लिम्बूले बताए ।

पानी पर्ने बित्तिकै सडक हिलाम्ये हुने गर्छ । भोजपुर र संखुवासभा आवतजावत गर्ने दैनिक सयौँ गाडी यस सडकखण्डबाट हिँड्ने गर्छ । एउटा गाडी फस्ने बित्तिकै यो सडकखण्डमा सवारीसाधनको लामो लाइन लाग्ने गरेको स्थानीय ज्ञानबहादुर गुरुङले बताए ।

करीब रु ३० करोडको लागतमा निर्माणाधीन उक्त सडक आगामी चैत मसान्तसम्ममा सम्पन्न हुने सम्झौता छ । अहिलेसम्म ५० प्रतिशत काम सम्पन्न भइसकेको मध्यपहाडी लोकमार्ग पूर्वी खण्ड डिकुरे क्षेत्रका सवइञ्जिनियर विवश अधिकारीले बताए ।

निर्माण कम्पनीलाई कामको गति बढाउन पटकपटक ताकेता भए पनि वर्षात् लागिसकेको हुनाले अब नौ महिनामा आयोजना सम्पन्न हुन निकै कठिनाइ हुने अधिकारीको भनाइ छ ।

नेपाली सेनाले २०५२ सालमा हिले–पाख्रिबास–लेगुवाको राम बजारसम्म सडक ट्रयाक खोलेको थियो ।

81 पटक पढिएको
Loading...

प्रतिक्रिया दिनुहोस

Powered by Facebook Comments

janta bank Janata Bank Janata Bank