धादिङ जिल्लामा डण्डीबियो प्रतियोगिता

सोमवार, फाल्गुन ६, २०७५



धादिङ ।  धादिङ जिल्लामा माध्यमिक विद्यालयस्तरीय डण्डीबियो प्रतियोगिता सुरु भएको छ । प्रतियोगिता उद्घाटनको अवसरमा धादिङ चिनाउने विविध झाँक्रीहरुको प्रदर्शनी गरिएको छ ।

आइतबार धादिङबेसी खुलामञ्चमा जिल्ला समन्वय समिति प्रमुख जगन्नाथ नेपालले डण्डीबियो खेलमा बियो हानेर उद्घाट गर्दै खेललाई संस्कृतिको रुपमा बचाउन आग्रह गरे ।

लोपोन्मुख अवस्थामा रहेको नेपाली पहिचानसहितको डण्डीबियो राष्ट्रिय खेलको रुपमा मानिएको भए पनि जिल्लामा भने पहिलो पटक डण्डीबियो संघ र नेपाल स्काउट धादिङले प्रतियोगिता आयोजना गरेका हुन् । जिल्लाका ४१ विद्यालयले प्रतियोगितामा सहभागिता जनाएका छन् ।

प्रतियोगितामा प्रथम, द्वितीय, तृतीय र सान्त्वना हुने समूहले ५० हजार, ३० हजार, २० हजार र १० हजार रुपैयाँ पुरस्कार प्राप्त गर्ने नेपाल स्काउट धादिङका समन्वय आयुक्त शिव सापकोटाले जानकारी दिनुभयो ।

डण्डीबियो खेल उद्घाटनअघि जिल्ला सदरमुकाममा डण्डीबियो सहितको साँस्कृतिक झाँक्रीहरुको प्रदर्शनी गरिएको थियो । तामाङ, नेवारी, मगर, मधेसी, गुरुङ, शेर्पालगायतको भेषभुषमा आधारित झाँकी, डण्डीबियोको प्रदर्शनी, टाकटुके र पञ्चेबजा तथा लाखे समेतको झाँकीहरु प्रदर्शन गरिएको नेपाल डण्डीबियो संघका राजकुमार श्रेष्ठले जानकारी दिए ।

Loading...

प्रतिक्रिया दिनुहोस

Powered by Facebook Comments

Janata