प्रस्तावित प्रधानन्यायाधीश जोशीबारे संसदीय समिति अझै किन् अनिर्णित ?

बुधबार, साउन १६, २०७५



काठमाडौँ ।  प्रस्तावित प्रधानन्यायाधीश दीपकराज जोशीबारे संसदीय समितिले अझै निर्णय लिन सकेन् । सत्तापक्षसँग दुई तिहाई सांसद भएपनि  सहमतिमा अस्वीकृत गर्ने प्रयास नेकपाका सदस्यहरूले राखेपनि कांग्रेसबाट समितिका सदस्यहरूले आनाकानी गर्दा समितिले निर्णय लिन नसकेको हो ।

बैठकमा प्रमुख विपक्षी कांग्रेसका सदस्यहरूले संघीय कानुनको प्रश्न झिकेका थिए । कांग्रेस सदस्यहरुले संघीय कानुन नबनेकाले अनुमोदन गरिए मान्य नहुने बताएपछि  सहमतिका लागि भन्दै फेरि बैठक स्थगित गरिएको हो । शुक्रबार पनि सहमति नभए प्रक्रियाबाट टुंगो लगाउने नेकपाबाट समितिमा प्रतिनिधित्व गर्ने सदस्यहरूले बताएका छन् ।

पटक–पटक स्थगित हुँदै आएको समिति बैठक बुधबार दिउँसो बोलाइएको थियो । तर, बैठक साँझ मात्र बस्यो । उक्त बैठक पनि निर्णयमा पुग्न सकेन् । बैठक शुक्रबारसम्मका लागि स्थगित भएको छ ।

समितिले साउन १० गते सुनुवाई गरेको थियो । त्यसपछि दुई बैठक बस्दै नबसी स्थगित भएको थियो । बुधबारसहित दुई वटा बैठक भने बसेपनि निर्णय हुन सकेन ।

देउवालाई दवाव

बुधबार नै  कांग्रेस सभापति शेरबहादुर देउवा र नेपाल बार एसोशिएसनमा रहेका कांग्रेस निकट पदाधीकारीबीच भेटवार्ता भएको थियो । बारका अध्यक्ष शेरबहादुर केसी लगायतका पदाधिकारीले जोशीलाई प्रधानन्यायाधीश बनाउन कांग्रेस सभापति शेरबहादुर देउवालाई दबाब दिएका छन् ।

प्रधानन्यायाधीशमा जोशी अस्वीकृत हुनुपर्नाका कारण

संसदीय सुनुवाइ समिति स्रोतका अनुसार प्रस्तावित प्रधानन्यायाधीश दीपकराज जोशीको शैक्षिक प्रमाणपत्रदेखि जन्ममितिसम्म विवादास्पद भेटिएको छ । जोशीले विजय मेमोरियल स्कुलबाट ०२७ मा प्रवेशिका परीक्षा दिएका छन् । नेपाल राष्ट्रिय विद्यापीठबाट जोशीले ०२९ मा प्रवेशिका परीक्षा दिएकोसमेत प्रमाणपत्रमा उल्लेख छ ।

समितिमा जोशीले आफूले विजय मेमोरियल स्कुलमा १० कक्षा पढेको र नेपाल राष्ट्रिय विद्यापीठबाट प्रवेशिका परीक्षा दिएको बताएका छन् । ‘०२७ मा विजय मेमोरियल स्कुलबाट एसएलसी परीक्षा दिएको प्रमाण भेटिएको छ । उनको सिम्बोल नम्बर १२५८ बी हो,’ समिति स्रोतले भन्यो ।

त्रिविको नेपाल ल क्याम्पसमा जोशीले बुझाएको प्रोगेस रिपोर्टमा विजय मेमोरियल स्कुलबाट प्रवेशिका परीक्षा दिएको र त्यतिवेलाको सिम्बोल नम्बर ३६६७ भनिएको छ । उनकै अर्को शैक्षिक प्रमाणपत्रमा नेपाल राष्ट्रिय विद्यापीठबाट ३६६७ सिम्बोल नम्बरमा प्रवेशिका परीक्षा दिएको उल्लेख छ । ‘विजय मेमोरियल र नेपाल राष्ट्रिय विद्यापीठ दुवैबाट प्रवेशिका दिए । दुवैको सिम्बोल नम्बर एउटै भएको डकुमेन्टमा उल्लेख छ, एउटा संस्कृत स्कुल अर्को जनरल स्कुल । यस्तो कसरी हुन्छ ?’ स्रोतले भन्यो ।

डिल्लीबजारको विजय मेमोरियल स्कुलबाट जोशी वीरगन्जमा संस्कृत पढ्न गएकोसमेत जनाइएको छ । स्रोतका अनुसार दुईतिर कसरी एउटै सिम्बोल नम्बर भयो भन्ने प्रश्नमा जोशीले आफूले टेस्टसम्म विजय मेमोरियल र त्यसपछि नेपाल राष्ट्रिय विद्यापीठमा पढेकाले त्यस्तो भएको भन्ने अपत्यारिलो जवाफ दिने गरेका छन् ।

क्याम्पसमा जोशीले पेस गरेको प्रोगेस रिपोर्टमा विजय मेमोरियलबाट ०२९ मा एसएलसी गरेको उल्लेख छ । तर, उनले ०२७ मा एसएलसी दिएको अर्को डकुमेन्ट सुरक्षित छ । ‘परीक्षा नियन्त्रण कार्यालयमा हेर्दा ०२९ मा ३६६७ सिम्बोल नम्बरमा हिमबहादुर लेकालीले परीक्षा दिएको भेटिन्छ । लेकालीले नारायण विद्या मन्दिर हाईस्कुल काठमाडौंबाट परीक्षा दिएका हुन् ।

जोशीको सर्टिफिकेटले यो सिम्बोल नम्बर जोशीकै हो र ०२९ मा विजय मेमोरियलबाट एसएलसी दिएको भन्ने छ । तर, ०२९ मा विजय मेमोरियलको एसएलसीको सिम्बोल नम्बर १५१७३ देखि १५२३० सम्म मात्र छ । ०२९ को लिस्टमा दीपकराज जोशी भन्ने मान्छे नै छैन,’ स्रोतले भन्यो ।

Loading...

प्रतिक्रिया दिनुहोस

Powered by Facebook Comments

Janata Bank (Detail page 2nd) Janata Bank