सामाजिक सञ्जालमा मोदीप्रति यति धेरै आक्रोस किन ?

शुक्रबार, बैशाख २८, २०७५



- नरेन्द्र मिश्र

पछिल्लो समय आमसञ्चार क्षेत्रको विकाससँगै सूचना तथा सञ्चारको क्षेत्रमा धेरै नेपालीको पहुँच पुगेको छ । जसले गर्दा मानिसहरू आफ्ना विचार तथा भावनाहरू साटासाट तथा आदानप्रदान गर्न सामाजिक सञ्जालहरू (फेसबुक, ट्वीटर, स्काईप आदि) माध्यम बनिरहेका छन् । विभिन्न विषयमा विचारहरू प्रस्तुत गर्ने पाटो यी माध्यम बनेका छन् ।
भारतीय प्रधानमन्त्री नरेन्द्र मोदी नेपाल आउने चर्चा चलेदेखि नै सामाजिक सञ्जालमा ठूलो आक्रोस देखियो । मोदीको भ्रमणबारे नेपालीहरूले सधैँ नकारात्मक टिप्पणी गरेको देखिन्छ । आक्रोस पोखेको देखिन्छ । यो मात्र नभइ जुनसुकै विषयमा पनि नकारात्मक टिप्पणी गर्नेहरूको कमी छैन् ।
मोदीको नेपाल भ्रमण, यसबारे देखिएको तीव्र आलोचना र आक्रोशले भारतले लगाएको नाकाबन्दी नेपालीले बिर्सी नसकेको रुपमा लिन सकिन्छ । जसका कारण तीखो प्रहार पनि स्वभाविक रुपमा लिएको देखिन्छ । त्यो बेलाको दुःख बिर्सन नसक्नु नै आलोचनाको प्रमुख पाटो बनेको हो ।

मानसिकता नै नकारात्मक
मोदीको नेपाल भ्रमणको विषयमा मात्र होइन, प्रायः सवै विषयमा नकारात्मक टिप्पणी गर्नेहरू धेरै छन् । सरकारी निर्णय एकपक्षीय हुनुले पनि विरोध र आक्रोशलाई बल पुर्याउँछ ।
हाम्रो दक्षिणी सिमानामा रहेको भारतसँग खुल्ला सिमाना हुनु, बसाईसराईजस्ता सामाजिक, आर्थिक, राजनीतिक, सांस्कृतिक भौगोलक जस्ता बिषयहरूमा सधैँभरी प्रत्यक्ष तथा अप्रत्यक्ष सम्बन्ध रहिरहने भएकाले पनि यस्ता उठ्ने÷उठाउने गरिएको पाइन्छ । नेपाल र भारत बीचका खुला सिमाना भएकाले पनि यससम्बन्धी कुराहरू धेरै उठ्ने गरेका छन र यो उठनु स्वभाविक पनि हो ।

उचित वैदेशिक नीति आवश्यक
यस्ता विवादबाट माथि उठ्न नेपालले उचित बैदेशिक नीति तयार पारि कार्यान्वयन गर्न जरुरी छ । समाजलाई सकारात्मक धारबाट अगाडि बढाउनुपर्नेछ । तर यो धेरै जटिल पक्ष हो । समाजलाई सकारात्मक धारबाट अगाडि बढाउन व्यक्तिगत विचारको सम्मान गर्ने परिपाटी हुनु आवश्यक छ । सबैभन्दा ठुलो कुरा हामी सबैभन्दा पहिले आर्थिक रुपमा सबल हुनु जरुरी छ । भारत हाम्रो छिमेकी भएका कारण राजनीति, इतिहासलगायत सबै कुरा जोडिएको छ । त्यसैले हामीले विगतका गल्तीलाई सच्याउँदै दुई देशबीचको समधुर सम्बन्ध कायम गर्नुपर्छ ।

नागरिक सचेत बन्नुपर्छ
नागरिकहरू पनि सचेत हुन जरुरी छ । त्यसमा नागरिकका भूमिका र विचार कसरी उत्पादन हुन्छन भन्ने कुरा हुन्छ । आर्थिक, सामाजिक पक्ष पनि जोडिएको हुन्छ । हामी आर्थिक पक्षले सबल हुन सक्यौँ भने समाजमा देखापर्ने विकृति र विसंगतिहरू सबै आफैँ निर्मुल हुन्छन । आर्थिक पक्ष हाम्रो लागि सबैभन्दा मुल विषय हो । पछिल्लो समय हामी नेपालीहरूको पनि आर्थिकस्तर केही माथि उठेको छ । तर, जबसम्म हाम्रो आर्थिक अवस्था पूर्ण रुपमा सुध्रदैन तबसम्म यस्ता नकारात्मक टिप्पणीहरू आईरहन्छन । यस्तै हाम्रा नीति, नियमहरू पनि परिमार्जन गर्नुपर्ने देखिन्छ । भएका नीति, नियमहरू लागु गर्नुपर्ने चुनौती पनि हामीमाझ छ । वैदेशिक कुटनीति सम्बन्धी थप नीति बन्नेमा हामी पनि आशावादी छौँ ।
(समाजशास्त्री तथा आरआर क्याम्पस समाजशास्त्र विभागका प्रमुख नरेन्द्र मिश्रसँग नेपालपाटीका डटकमका लागि एलीना कार्कीले गरेको कुराकानीमा आधारित ।)

Loading...

प्रतिक्रिया दिनुहोस

Powered by Facebook Comments

Janata Bank (Detail page 2nd) Janata Bank